इन्जिनियरिङ अध्ययन संस्थान (आइओई) को इन्जिनियरिङ स्नातक तहमा भर्नाका लागि प्रवेश परीक्षा दिन चाहने विद्यार्थीको संख्या करिब १३ हजार पुगेको छ ।
माघ १४ गते हुने आइओईको प्रवेश परीक्षामा स्नातक तहमा इन्जिनियरिङ र आर्किटेक्चर पढ्न चाहने १२ हजार ७ सय विद्यार्थीले प्रवेश परीक्षाका लागि अनलाइनमाध्यमबाट आफ्नो नाम दर्ता गराएका हुन् ।
पुस १९ गते अनलाइन नाम दर्ता फारम खुला गरिएको थियो । नाम दर्ता गर्ने समय माघ ४ गतेसम्म तोकिएको थियो । यस अवधिमा १२ हजार २ सयको हाराहारीमा विद्यार्थीले फाराम भरेको आइओई स्रोतले इन्जिनियर्स पोस्टलाई जानकारी दियो ।
यसअघिका वर्षमा १० हजारदेखि ११ हजारको हाराहारीमा प्रवेश परीक्षाका लागि विद्यार्थीले फाराम भर्ने गरेका थिए । कोभिड–१९ महामारीका कारण यसपटक विद्यार्थीहरुको नेपालमै आकर्षण देखिएका कारण फाराम भर्नेको संख्या बढेको हो ।
यसअघि प्रवेश परीक्षामा करिब ७ हजारले नाम निकालेका थिए । आइआईको आंगिक र सम्बन्धन प्राप्त कलेजमा गरेर ४ हजार २ सय ४८ सिट छ । विद्यार्थीको संख्या बढेकाले यसपटक सम्बन्धन कलेजमा विद्यार्थीको संख्या पनि बढ्ने अनुमान छ ।
आइओईमा धेरै विद्यार्थीले छात्रवृत्तिका लागि प्रवेश परीक्षा दिने गर्छन् । छात्रवृत्ति नपाएको अवस्थामा केही विद्यार्थी इन्जिनियरिङभन्दा अन्य विषय पढ्ने र केहीले अन्य कलेज रोज्ने भएकाले यसअघि आइओईअन्तर्गतका कलेजमा केही सिट खाली हुने गथ्र्यो ।
आइओईको प्रवेश परीक्षामा ४० प्रतिशतभन्दा माथि अंक ल्याएर पास गर्ने विद्यार्थीले आइओईको सम्बन्धन प्राप्त कलेजमा इन्जिनियरिङ पढ्न पाउँछन् । आइओईका ५ आंगिक र १० सम्बन्धन प्राप्त कलेज छन् ।
Your Opnion