काठमाडौं/ १० वैशाख । अर्थसचिवमा मधुकुमार मरासिनीलाई फेरि ल्याइएको छ । सोमबार बसेको मन्त्रिपरिपद्को बैठकले अदालतबाट सफाइ पाएका मरासिनीलाई अर्थसचिव नियुक्त गरेको सरकारका प्रवक्ता तथा सञ्चार तथा सूचना प्रविधिमन्त्री रेखा शर्माले जानकारी दिइन् । मरासिनी यसअघि उद्योग मन्त्रालयमा थिए ।

हालका अर्थसचिव डा. कृष्णहरि पुष्करलाई प्रधानमन्त्री तथा मन्त्रिपरिषद्को कार्यालयमा पठाइएको छ ।

नेसनल पेमेन्ट खरिद प्रकरणमा मरासिनीले सफाइ पाएका हुन् । मरासिनी अर्थ मन्त्रालयको बजेट महाशाखा प्रमुख हुँदा पेमेन्ट गेटवे खरिदका लागि बजेट विनियोजन भएपछि अख्तियार दुरुपयोग अनुसन्धान आयोगले उनीविरुद्ध पनि भ्रष्टाचारको मुद्दा चलाएको थियो । तर, विशेष अदालतले अख्तियारको दाबीलाई अस्वीकार गर्दै सचिव मरासिनीलाई सफाइ दिएको हो ।