काठमाडौँ / ५ भाद्र । भारतको गुवाहाटीमा सबैभन्दा जेठो हात्ती ८९ वर्षको उमेरमा मृत्यु भएको छ । विश्वको सबैभन्दा बूढोमध्येको एक हो यो हात्ती ।
पूर्वी राज्य आसामको सोनितपुर जिल्लामा अवस्थित चिया बगानमा उक्त हात्तीको मृत्यु भएको हेरचाहमा खटिएका कर्मचारीले एएफपीलाई बताएका छन् ।
एक बेलायती किसानले सन् १९४० मा चिया बगानमा काम गर्न ल्याएको हात्तीलाई पाँच वर्ष अघिसम्म काममा लगाइएको थियो । बिजुलीप्रसाद नामको उक्त हात्तीका सबै दाँत झरेकाले उसलाई पछिल्लो समय चामल र भटमास पकाएर खुवाइने गरिएको समाचारमा उल्लेख छ ।
त्यहाँका पशु चिकित्सक कुशल कोंवर सरमानले भने अनुसार हात्तीको औसत उमेर ८० वर्ष हो । पर्याप्त प्राकृतिक आहारको अभावमा बिजुलीप्रसादको ज्यान गएको हुन सक्ने सरमानको अनुमान छ । उसको मृत्यू सोमबार बिहान भएको थियो ।
एएफपी
Your Opnion