बेलायतको लिड्समा कार्यरत एक युवा नेपाली इन्जिनियर सेलिना राईले १५ सय पाउण्ड पुरस्कारसहित ‘इन्टरनेसनल इमर्जिङ इन्जिनियर अवार्ड’ जितेकी छन् ।
अवार्डका लागि विभिन्न समूहबाट फाइनलमा छनोट भएका प्रतिस्पर्धी इन्जिनियरहरूमध्ये उनी उत्कृष्ट हुँदै अवार्ड हात पारेकी हुन् । बेलायतसहित संसारभरीका इन्जिनियरहरू आबद्ध हुने एक संस्था ‘इन्स्टिच्युट अफ सिभिल इन्जिनियर’ ‘आइसीई’ ले राईलाई अवार्ड प्रदान गरेको हो ।
प्रारम्भिक चरणको प्रतिस्पर्धामा संसारभरीका सैयौं इन्जिनियरहरूले आफ्नो प्रतिवेदको नमुना पठाएका थिए । तीमध्ये उत्कृष्ट ४ फाइनलिस्टहरूले पूरा प्रतिवेदन प्रस्तुत गरे । त्यसको मूल्यांकनपछि राई विजेता बनेकी हुन् ।
उनी बेलायतमा एक ‘स्ट्रक्चरल इन्जिनियर’ का रूपमा कार्यरत छन् । आफूले आर्जन गरेको ज्ञान र सीपलाई तिखार्न यो अवार्ड प्रतिस्पर्धाले महत्वपूर्ण भूमिका खेलेको उनले बताएकी छन् ।
हालसालै पढाइ पूरा गरी काम सुरु गरेका, पढाइ गर्दै गरेका र ट्रेनी इन्जिनियरहरूबीच प्रतिस्पर्धा गराई उत्कृष्ट एकलाई हरेक वर्ष यो अवार्ड दिने गरिन्छ । यस वर्ष कोभिड–१९ का कारण सम्पूर्ण प्रतिस्पर्धा भर्चुअल रूपमा गराइएको थियो ।
Your Opnion