राम्ती नदीमा निर्मित राप्ती पुल भत्किएको छ । दाङको देउखुरी क्षेत्रको राप्ती गाउँपालिका र गढवा गाउँपालिका जोड्ने गरी निर्माण गरिएको उक्त पुल बुधबार राप्ती नदीमा आएको बाढीले भत्काएको हो ।
पुलमा नदीले क्षति पुर्याएपछि यातायात आवागमन अवरुद्ध भएको छ । उक्त पुल राप्ती गाउँपालिकाको सिसहनियाँ र गढवा गाउँपालिकाको महदेवा जोड्ने सो पुल गत माघ १२ गते प्रधानमन्त्री केपी शर्मा ओलीले उद्घाटन गरेका थिए ।
महदेवातर्फ १५–२० मिटर सडक बाढीले बगाएकाले बुधबार बिहानबाट यातायात आवागमन अवरुद्ध भएको जिल्ला प्रशासन कार्यालयले जनाएको छ । कार्यालयका अनुसार तत्काल मर्मत गर्न नेपालगन्जस्थित पुल विभागलाई अनुरोध गरिएको छ ।
राप्ती नदीमाथिको उक्त पुल २०७३ मंसिर २२ गते तत्कालीन प्रधानमन्त्री पुष्पकमल दाहाल प्रचण्डले शिलान्यास गरेका थिए । उक्त पुल एएनके लुम्बिनी वाईपी जेभीले पूर्वनिर्धारित समयभन्दा अगावै निर्माण सम्पन्न गरेको थियो ।
Your Opnion