दोर्दीखोलामा आएको बाढीले निर्माण सम्पन्न हुन लागेको २५ मेघावाट क्षमताको माथिल्लो दोर्दी ‘ए’ जलविद्युत् आयोजनामा क्षति पुगेको छ । ७० प्रतिशत ऋण र ३० प्रतिशत नेपालकै उद्यमीहरूको लगानीमा लिबर्टी इनर्जी हाइड्रोपावर कम्पनीले यो आयोजना निर्माण गर्न लागेको हो ।
सदरमुकाम बेसी शहरबाट २५ किलोमिटर टाढा रहेको हाइड्रोपावरसम्म पुग्न कच्ची बाटो भएकाले समस्या छ । मंगलबार लिवर्टीको शेयरमूल्य ६ प्रतिशतभन्दा धेरैले घटेको थियो । साथै, धितोपत्र बोर्डले बाढीले क्षति पुग्नुभन्दा एक दिनअघि मात्र लिवर्टीलाई जोखिमको सूचीमा राखेको थियो । गत वर्षको बाढीले त्यहाँ कार्यरत २ जनाको ज्यान गएको थियो ।
त्यस्तै, सोही खोलामा निर्माणाधीन २७ मेगावाटको दोर्दी खोला जलविद्युत् आयोजनामा पनि क्षति पुगेको छ । हिमालयन पावर पार्टनरले निर्माण गरिरहेको उक्त आयोजनामा गैरआवासीय नेपालीद्वारा स्थापित एनआरएन इन्भेस्टमेन्टको ५१, आईएमई ग्रुपको ३४ दशमलव तीन र ३० प्रतिशत सर्वसाधारणको लगानी छ ।
पछिल्लो समय हिमालयन पावर पार्टनको सेयर मूल्यमा राम्रो बृद्दि भइरहेको थियो । दुई दिनअघि मात्र कम्पनीको सेयर मूल्य ९ प्रतिशतभन्दा बढीले बढेको थियो ।
यस आयोजनाको इलोट्रो–मेकानिकल, पेनस्टकको काम मात्र बाँकी थियो । पनस्टेकको ७०० मिटरमध्ये करिब ५० मिटर मात्र काम बाँकी थियो । आयोजना ९८ प्रतिशत निर्माण सम्पन्न भएको थियो । नेपाल विद्युत् प्राधिकरण र कम्पनीबीच सुक्खायाममा आठ रुपैयाँ ४० पैसा र वर्षायाममा चार रुपैयाँ ८० पैसामा विद्युत् खरिद गर्ने सम्झौता भइसकेको छ ।
पछिल्लो समय निर्माण सम्पन्न हुन लागेका यी दुई कम्पनीको जलविद्युत आयोजनाको सेयर कारोबारमा तीव्रता आएको थियो । यी आयोजनाहरुमा के–कस्तो क्षति पुगेको हो भन्ने एकीन विवरण भने आउन सकेको छैन । तर, भौतिक संरचनामा समेत क्षति पुगेको बुझिएको छ । बाढीले अन्य आयोजनाहरुमा पनि क्षति पुगेको बताए तापनि एकीन विवरण आउन सकिरहेको छैन ।
Your Opnion