नागढुंगा–सिस्नेखोला सुरुङमार्ग निर्माणमा खटिएका १६ जनामा कोरोना संक्रमण पुष्टि भएको छ । स्रोतले इन्जिनियर्स पोस्टलाई दिएको जानकारीअनुसार त्यहाँ कार्यरत इन्जिनियर, सब–इन्जिनियर, प्राविधिक र कामदारमा संक्रमण देखिएको हो ।

कोरोना संक्रमण माहामारी र लकडाउनका बीच पनि नागढुंगा–सिस्नेखोला सुरुङमार्ग निर्माण कार्य दिनरात चलिरहेको छ । साइटमा दैनिक इन्जिनियर, सब–इन्जिनियर, प्राविधिक तथा कामदार गरेर ६ सय ५० जनाले काम गरिरहेका छन् । तीमध्ये करिब १ सय इन्जिनियर, सब–इन्जिनियर र प्राविधिक छन् ।

साइटमा १० कोठाको आइसोलेससमेत वार्ड छ । १० कोठामा जम्मा ३२ जना राख्न मिल्छ । १५ ओटा अक्सिजन पनि तयारीका साथ राखिएको छ । चिकित्सकीय टोलीको पनि व्यवस्था गरिएको छ । संक्रमितहरु सोही आइसोलेसन वार्डमा उपचाररात छन् ।

सन् २०२२ सम्ममा निर्माण कार्य सम्पन्न गर्ने आयोजनाको लक्ष्य छ । जापान सरकारको १५ अर्ब २८ करोड ऋण सहयोगमा सुरुङमार्ग निर्माणको काम अघि बढेको हो । परियोजनाको कूल लागत २० अर्ब ४० करोड हुने अनुमान जाइकाको छ ।