जिल्ला प्रशासन कार्यालय (जिप्रका) ले कोभिड–१९ (कोरोना) संक्रमणका कारण सार्ने तयारी गरिएको नेपाल इन्जिनियर्स एसोसिएसन (नेईए) को निर्वाचन सार्नुपर्ने अवस्था नरहेको बताएको छ ।

सोमबार जिप्रका प्रतिनिधि, नेईए पदाधिकारी र निर्वाचन समितिसँगको छलफलमा जिप्रकाका प्रतिनिधिले हालको अवस्थामा पूर्वनिर्धारित नेईए निर्वाचन सार्ने भन्दा पनि सावधानी अपनाएर निर्वाचन गर्न सुझाव दिएको हो ।

बैठकमा सहभागी स्रोतका अनुसार बैशाख २४ गते हुने नेईए निर्वाचनलाई कोरोना संक्रमणको हालको अवस्थासँग दाँजेर हेरिएको थियो । तर, हालको अवस्थामा पूर्वनिर्धारित निर्वाचन सार्नुपर्ने त्यति ठूलो कारण नरहेको जिप्रका प्रतिनिधिले बताएका थिए ।

निर्वाचन विद्युतीय मतदान प्रणालीबाट हुँदैछ । सो दिनका लागि नेपाल प्रज्ञा प्रतिष्ठान पुरै बुक भएकाले ठाउँ फराकिलो छ । त्यसैले पनि स्वास्थ्य सतर्कता अपनाउँदै निर्वाचन गर्न सक्ने अवस्था छ । तर, निर्वाचन गर्न नचाहने केही पक्षले कोरोना संक्रमणलाई कारण देखाएर निर्वाचन सार्ने चलखेल गरेका थिए ।

स्रोत इन्जिनियर्स पोस्टलाई भन्यो, ‘कोरोनालाई कारण देखाएर निर्वाचन सार्ने चलखेल पनि अब समाप्त भएको छ । बल्ल बैशाख २४ मै निर्वाचन हुने कुरामा ढुक्क भयो ।’