नेपाल इन्जिनियर्स एसोसिएसन (नेईए), निर्वाचन समितिले आफ्नै निर्णय विपरित आफूहरुको उम्मेदवारी रद्द गरेको भन्दै पीडित पक्षले जिल्ला प्रशासन कार्यालय (जिप्रका) मा उजुरी दिएको छ ।
निर्वाचन समितिले एक ब्यक्तिले एकभन्दा बढी उम्मेदवारलाई समर्थन या प्रस्ताव गरेको खण्डमा सच्याउन दिने निर्णय गरेको तर व्यवहारमा लागू नगरेको भन्दै पीडित पक्षले न्याय माग्दै उजुरी दिएको हो ।
निर्वांचन समितिले चैत २७ गतेसम्मको समय दिएर प्रस्तावक वा समर्थक सच्याउने अवसर दिएको र आफूहरुले सो समयसीमाभित्र सच्याएको भए तापनि उम्मेदवारी रद्द गरिएकोप्रति आपत्ति जनाउँदै पीडित पक्षले प्रमुख जिल्ला अधिकारी समक्ष न्याय माग गरेको हो ।
आफैले गरेको निर्णयको विरुद्दमा गएर उम्मेदवारले पाउने प्राकृतिक, नैंसर्गीक र लोकतान्त्रिक अधिकारको हनन गरी उम्मेदवार हुनबाट बञ्चित गरेको भन्दै उपाध्यक्षका उम्मेवार ई. देउकाजी गुरुङ, महासचिवका उम्मेदवार ई. विरोध रिजाल, उपमहासचिवका उम्मेदवार ई. हिरामान वाईवा, सदस्यका उम्मेदवार ई. लक्ष्मी नारायण चौधरी र लोकनाथ रेग्मीले उजुरी दिएका हुन् ।
यी उम्मेदवारले निर्वाचन समितिको गलत निर्णय सच्याउन पहल गर्न आग्रहसमेत गरेका छन् ।
यस विषयमा थप जानकारीका लागि तलको समाचार पढ्नुहोलाः
नेईए निर्वाचन समितिले एक पक्षलाई साथ र अर्को पक्षलाई घात गरेको प्रमाण भेटियो
Your Opnion